جستجو
تاريخ انتشار : 1396/09/25 - 18:38
ایکینجی دونیا موحاریبه سینده فاشیسم اوزه رینده غلبه دن 72 ایل کئچیر./ هیتلرین اوتاغینا گیره ن آذربایجانلی کیمدی؟
هیچ واخت اینانمازدیق کی،نه واختسا هیتلرین اوتاغیندا اولاریق.هیتلر آلمانلارین دؤشونجه سینی تامام دییشمیشدی.فاشیست لرین بوتون ایشغال ائتدیک لری یئرلرده بو جور دوشرگه لر وارایدی.اونلار اسیرلردن قول کیمی ایستیفاده ائدیردیلر.کیمسه سسینی چیخاردان کیمی گولله له ییردیلر..بیزیم اسیرلردن چوخو آجیندان اؤلموشدو.آلمانلار اونلارا ...

   

 

ایکینجی دونیا موحاریبه سینده فاشیسم اوزه رینده غلبه دن 72 ایل کئچیر.

 چنگیز علی اکبر اوو  ایکینجی دونیا ساواشیندا روس اوردوسونون آغیر خمپاره آتان هنگ- ین کوماندیری بیر موصاحیبه ده:

1925 جی ایلین 30 اگوست تاریخینده باکی شهرینده آنادان اولموشام.آتام 32 یاشیندا وفات ائدیب.آنام و مندن ایکی یاش بؤیوک باجیم لا بیرلیکده یاشاییردیق. اورتا تحصیلیمی باش ووردوقدان سونرا 1943 – جو ایلین فئورال آییندا اوردویا چاغیریلدیم

.سومقاییت دا کی احتیاط " هنگ " ده 6 آی مشق ائتدیکدن سونرا  بیزی جبهه یه  یولا سالدیلار.

416-جی لشگرین ، 1374 نؤمره لی آرپی جی آتان  گردان – یندا یئر آلمیشام.جبهه حیاتیم  لشگر ایله بیرلیکده باشلاییب. بیزده  او واختلار وطن پرورلیک روحو گوجلوایدی.چونکی  "سازمانهای پیشگام نظامی"چوخ فعال ایدیلر.

اورتا مکتبی اعلا قیمت لرله بیتیرمیشدیم.او واخت کی قایدالارا گؤره اورتا مکتبی یاخشی قیمت لرله بیتیرن لر ایسته دیکلری مکتبه ایمتحان سیز قبول اولونا بیلردیلر. منیمده بئله بیر شانسیم وارایدی.آنجاق وطن سئوگیسینه گؤره حربی کومیسارلیغا گئدیب کؤنوللو جبهه یه گؤنده ریلمه ییمی  خواهیش ائتدیم.

18 یاشیم تامام اولموشدی،منی حربی کومیسارلیغا دعوت ائتدیلر و او واخت بیزیم مشهور 416-جی لشگرین، شیمالی قافقازدا بیر چوخ اوغورلو دؤیوشلری اولموشدو.

سوال:17 یاشلی بیر گنج اوچون گولله سسی،اینسان اؤلدورمک، عومومییت له موحاریبه ، دهشتلی گلمه دی می؟

 البته جبهه حیاتی تامام باشقا ایدی.بیز سانبئق تپه لرینین یاخینلیغیندا مؤوقعه توتموشدوق.آلمانلار هوندورلوکده مودافیعه خطی یاراتمیشدیلار.اونلار بیزی یوخاریدان موشاهیده ائدیردیلر.

آلمانلار بیزیم مؤوقعه لریمیزه ایسته نیلن  آن ،آتش آچیردیلار.بیر آز بیزهمین مؤوقعه لرده دوردوق.سونرا "تاقانروقا" هوجوما کئچمه یه باشلادیق. اورادا آتشین نه اولدوغونو ، دوشمن آتشین دن قورونماق اوچون هانسی اصول لاردان ایستیفاده ائتمه ییی اؤیره نمیشدیم.دؤیوشه تام حاضیرایدیم.بیزیم جبهه ده قورخو حیس اولونموردو.چونکی هر آن اؤلوم له راستلاشیردیق.

بونا گؤره ده اؤلوم بیزه عادی لشمیشدی.عینی زاماندا قارشیمیزا غلبه قازانماق تاپشیریغی قویولموشدو.منده دؤیوش روحو او قدر یؤکسک ایدی  کی،بیر ایل 9 آی  سنگرده فاصیله سیز ،آرخایا چکیلمه دن دؤیوشموشم..

سوال: سیزین لشگرینیز یالنیز آذربایجانلیلاردان عیبارت ایدی؟

416- جی لشگر ، 1942-جی ایلده آذربایجاندا تشکیل اولونموشدو.اساس دؤیوشچولر آذربایجانلیلار ایدی.آمما دؤیوش لر داوام ائتدیکجه ،اؤلن و یارالانان عسگرلرین یئرینه یئرلی ساکین لردن گنج لر قوشولوردو.آرامیزدا روس لار و اوکرایین لیلار دا وار ایدی.گورجولر و ائرمنی لر ایسه آز ایدی.اونلار دا آذربایجان دا یاشایانلار ایدیلار.

 

سوال: هانسی دؤؤیوش لرده ایشتیراک ائتمیشدینیز؟

1943-جو ایلین اگوست آییندا "آزوو" دنیزین ساحیل لرینده ، لشگر هوجوما کئچدی.130-جو لشگر ایله برابر تانک قوشون لاری دا بیزه کؤمک ائدیردی.لشگرین " راستوو" ولایتینده بیرینجی غلبه سی" تاقانروق" شهرینین آزاد اولونماسی ایدی. بو شهر یازیچی" آنتون چئخووون" اونار( ثابت)  شهری دی.بونا گؤره ده لشگره  "تانقروق" آدی وئریلمیش دی.دؤیوشلریمیز اوغورلا باشلامیشدی.اوردوموز ایره لی  له دیکجه  اوکرایینین جنوب ایستیقامتینده کی تورپاقلار آزاد ائدیلیردی.لشگریمیز داها   2 اونار مولدووانین" پایتختی کیشین یووو آزاد ائتدی."پروت "چایینا چاتاندا ایسه لشگر قیسا مودتده فرق لندیینه گؤره " تاقانروق" فخری آدینا ایکی اوردئن( درجه) علاوه اولوندو.

داها 2 اونار بیزی لهستانین پایتختی ورشووانین یاخینلیغینا گؤنده ردیلر.اورادا دؤیوش حاضیرلیغی کئچن دن 2 اونار  برلین ایستیقامتینده هوجوم باشلادی.لهستانین بیر چوخ شهرلرینی،یاشاییش منطقه لرینی دوشمن دن آزاد ائتدیکدن 2آونا لهستان ایله آلمانیا شهرینده کی "اودئر" چایینا چاتدیق.

"اودئرین" ساحیلین ده کی" کوسوین" شهرینی آزاد ائتدیکده سونرا بؤیوک برلین عملیاتی باشلادی .لشگریمیز اورادا بؤیوک قهرمانلیق گؤستردی.مایین 1- ده برلینین آلینماسی ایله غلبه نی قئید ائتدیک.

سوال:برلین دؤیوشو  یادینیزدا نئجه قالدی؟ هانسی صحنه لر هله  گؤزونوزون اؤنونده جانلانیر؟

 برلین دؤیوشو چوخ گرگین کئچمیشدی.بونو اول کی دؤیوش لر له  موقاییسه ائتمک اولماز.برلین 4 میلیون اهالیسی اولان شهرایدی.دوزدوز، اهالینین چوخو شهردن کؤچوب گئتمیشدی.اورادا چوخ آدام قالمامیشدی.تصور ائدین نهنگ بیر شهر ده  تانک لاردان، توپ لاردان آتش آچیلیردی."آویاسیا" شهری بمبا لاییردی.بئله بیر شرایط ده بیلمیردین کی آتش هارادان آچیلیر.هانسی پنجره  اویوغوندان( شکاف)،هانسی زیرزمی دن....

اینسانلار هر آددیم دا اؤلوم له اوز- اوزه ایدیلر.برلین دؤیوشلرینده تقریبا 320 مین اینسان اؤلموشدو.غربده ایسه ایددیعا ائدیردیلر کی گویا بیز برلین ده 800 مین دن چوخ ایتکی وئرمیشیک.

کوچه نین بیر طرفیندن او بیری طرفه کئچمک مومکون دئییل دی.فاشیست لر بوتون جبهه لردن گئری چکیلیب.برلین ده جمع لشمیشدیلر.متفیق لرین  قوشون لاری  برلینه گیره بیلمه دیلر.اونلار آلمانیادان آخان " ائلبا" چایینا قدر گلمیشدیلر.

.

برلین ده باش  وئریلن حادیثه لر هله ده یادیمدان چیخماییب.بیزیم مینا آتانلار ( آر پی چی ) دسته سینین کوماندئریمیز " ذاکیر حسین اوو ایدی. او بیزیم " هنگ" ین پیادا حیصه سیندن یاشی 55 دن چوخ اولان اکبر آدلی بیر کیشینی اونلارین کوماندیرینین  راضی لیغی ایله دسته یه  گؤتورموشدو.  اکبر یاشلی ایدی، هنگ له  بیرلیکده ایره لی گئده بیلمیردی.

 برلین دؤیوش لرینده هوندور مرتبه لی بینانین زیرزمی سینده  اکبر کیشینی یانیمیزدا ساخلاییردیق.همیشه دئییردی که منی 5 اوشاق گؤزله ییر.گؤزله ییرم موحاریبه قورتارسین،گئری قاییدیم. بیز بو زیرزمی دن موشاهیده ائدیردیک، دؤیوشوردوک،آلمان لار بیزیم طرفه آتش آچدیلار.اکبر هلاک اولدو.همین گون برلین ده آتش کسیلدی.آلمانلار تسلیم اولدولار.اونون حیاتی ایسه موحاریبه نین بیتمه سینه بیر نئچه ساعات قالمیش بیتدی. موحاریبه دن 70 ایلدن چوخ واخت کئچیر.باش وئره ن حادیثه لر هله ده گؤزومون اؤنونده دیر..

سوال: 1 ایل 9 آی ووروشماق،آیلار لا سویوق سنگر ده یاتماق سیزین اوجون چتین دئییل دی می ؟

من موحاریبه دن 5 ایل 2اونا دا  آلمانیا دا قوللوق ائتدیم.بیزیم لشکر گوجلو اولدوغونا گؤره اونو آلمانیادا ساخلادیلار.اوردودان، 1950-جی ایلین یاییندا ترخیص اولوندوم

جبهه یه گئده نده بیر آرزوم وارایدی کی ،ساغ سالامات ائوه قاییدیم.اؤز یئریمده یاتیم.دؤیوشده یاتماق دئییلن آنلاییش یوخدور.شینئلیمیزی قارین اوستونه سالیردیق،عسگر یولداشیملا کوره ک کوره یه  وئریب اوزانیردیق.

سوال :غلبه نی نئجه قئید ائتدینیز؟ غالیب گله جه یینیزی گؤزله ییردینیز می؟

 

سحر ساعات 10-11 راده لرینده آتش کسیلدی.چیخدیق یاخینلیقلاردا کی محله لره گؤز گزدیره ک  کی، نئجه شهردیر.بیر مئیدانا گلدیک کی بؤیوک بیر بینا وار. قاپیسیندا دا آغ خالاتلی آداملار دایانیب.اورادا یارالی آلمانلاری یئرلشدیرمیشدیلر.عسگر یولداشیملا اوراداکی اوتوراجاق لاردان بیرینده ایلشدیک. 10-15 دقیقه دن سونرا خسته خانادان ایکی نفر آغ خالاتلی جاوان قادین بیزه ساری گلدی.بیری آلمان قیزی،بیری ایسه چئخیالی.

آلمان قیزی بیزه یاخینلاشیب نسه دئدی.من بعضی سؤزلری باشا دوشدوم.بعضی لرینی ایسه یوخ.چون کی آلمان دیلینی بیر او قدر ده یاخشی بیلمیردیم.آلمانین یانینداکی چئخیالی قیز باشا دوشوردو.او منی ائولرینه دعوت ائتدی.اونلار کاسیب ایدیلر.من اونلار اوچون  دسته میزدن آذوقه گتیردیم.چون کی آلمانلار موحاریبه یه گؤره چوخ آجلیق چکیردیلر.

آتش کسدن سونرا برلین ده آلمانلار بیزه قارشی مهریبان داورانیردیلار.

قئید ائتمک کی من هیتلرین اوتاغیندا دا اولموشام.او زامان قاراوول رئیسی ایدیم.هیتلرین اقامتگاهینی بیزیم لشکره تاپشیرمیشدیلار.

9 مرتبه لی زیرزمی دی.4 مرتبه آشاغییا دوغرو اوتاق لاری گزمک اولوردو.قالان مرتبه لری سو باسمیشدی.

هیتلرین اوتاغی تخمینا 80-90 متر مربع اولاردی.اونون یازی میزی ده قالمیشدی.اقامتگاهی اله کئچیرن عسگر لر اوتاغی تالاییب چاپمیشدیلار.آلمان اوردئن لری، نیشان لاری، آیاقلاریمیزین آلتینا سپه لنمیشدی.

هیتلرین اوتاغیندا کی صندلی آلمانیانین بایراغی قالمیش دی.آی یاریم اورادا قاراوول خیدمتی چکدیک.   

آرامیزدا "میخاییل مارقوریج "آدلی یهودی واردی.او هیتلرین اوتاغیندا اوتوروب دئییردی کی، آمان تانریم.گؤر یهودی  بالاسی هارادا اوتوروب.

 

هیچ واخت اینانمازدیق کی،نه واختسا هیتلرین اوتاغیندا اولاریق.هیتلر آلمانلارین دؤشونجه سینی تامام دییشمیشدی.

برلین اله کئچیریلندن سونرا اؤلوم دوشرگه لریندن بیرینه داخیل اولدوق.اورادا متفیق لریمیزین طیاره چیلری،آلمانیانی بمبالایان عسگرلر اسیر ساخلانیلیردی.

فاشیست لرین بوتون ایشغال ائتدیک لری یئرلرده  بو جور دوشرگه لر وارایدی.اونلار اسیرلردن قول کیمی ایستیفاده ائدیردیلر.کیمسه سسینی چیخاردان کیمی گولله له ییردیلر..بیزیم اسیرلردن چوخو آجیندان اؤلموشدو.آلمانلار اونلارا قارشی آلچالدیجی حرکتلر ائدیردیلر.یهودی لره قارشی موناسیبت لاپ پیس ایدی.فاشیستلر یهودی لرین ساچلارینی قیرخیب،لوت سویوندوروردولار.اونلارا اولمازین ایشکنجه لرینی وئریردیلر.اؤلوم دوشرگه لرینده گازلا اونلاری بوغوب اؤلدوروردولر.

نظرات كاربران :
نام :
ايميل :
متن نظر : * 
 
متن بالا را وارد نماييد* 
 
آخرين اخبار
پر بازديد ترين مطالب
صفحه اصلي | نقشه سايت | تماس با ماتمام حقوق مادی و معنوی این سایت متعلق به نويد آذربايجان می باشد و استفاده از مطالب با ذکر منبع بلامانع است.
طراحي سايت و بهينه سازي سايت توسط سارگون