جستجو
تاريخ انتشار : 93/11/23 - 12:58
12 – جی ایل دؤنومو مناسیبتی له صفرخان اؤلمزدیر
12 – جی ایل دؤنومو مناسیبتی له صفرخان اؤلمزدیر

 

آذربایجانین خالقی آزی یوز ایلدن بری دیر کی، عموم ایران خالق لارینین ملی – دموکراتیک مبارزه لری نین اؤن سیراسیندا دؤیوشن خالقلاردان اولوب. ایستر مشروطه حرکاتی، ایسترسه ده اوندان سونرا ایران سوییه سینده گئدن آزادلیق حرکاتی نین باش لؤوحه سینی، آذربایجان و اونون یئنیلمز ایراده لی خالقی یازیبدیر.

 مشروطه نهضتی، شیخ محمد خیابانی حرکاتی، ایکینجی دونیا ساواشی نین آخیرلاریندا ایرانین شمال غرب و غرب منطقه لرینده باش وئرن آزادلیق حرکاتلاری، بهمن اینقیلابی و سایر حرکاتلاردا، آذربایجان خالقی نین مثل سیز و تاریخده قالار رولو اولموشدور. بو بؤیوک و شانلی خالقین مبارزه تاریخی ده، اونون ایگید و فداکار اوغول و قیزلارینین پارلاق سیمالاری لا ایشیق لانمیشدیر. حیدرخان عمو اوغلو، شیخ محمد  خیابانی، ستارخان، باقرخان و یوزلرجه، باشقا فداکار، یئنیلمز و سارسیلماز ایراده لی اینسانلار بو جرگه ده یئر دوتانلارداندیرلار.

معاصر ایران خالقلاری نین مبارزه تاریخینده آدی محبس لری تیتره دن، جلادلارین و قولدورلارین اوره یینه ولوله سالان و شرفله 32 ایل دن آرتیق عؤمرونو اینسانی ایده آللاری و خالقی نین آزادلیغی اوغروندا صرف ائدن صفرخان، ایستر آذربایجان خالقی نین، ایستر سه ده ایران خالقلاری نین فخری حئساب ائدیلیر. اونون تکجه وطنیمیزده دئییل، بلکه ده بوتون دونیادا بشریتین سعادتی و اینسانی آماللاری اوغروندا عؤمرونو مبارزه یه حصر ائدن اینسانلار سیراسیندا یئری واردیر. خالقیمیز، وطنیمیز بئله بیر یئنیلمز، دؤزوملو، جسارتلی و مباریز اینسانین شرفلی خاطیره سینی عزیز ساخلایاراق، اونونلا همیشه لیک فخر ائده جکدیر.

 صفر قهرمانیان(صفرخان گونش ایلی 1300 ده، عجب سیر ماحالی نین شیشوان کندینده محمد حسین کیشی نین عائله سینده دونیایا گؤز آچیر. او یئنی یئتمه لیک ایل لرینه دک آتاسی ایله بیرلیکده اکینچیلیک له مشغول اولور.جمعیتده کئچن معیشت گرگین لیگی، آجلیق، مولکدارلارین ظولمو، کند کوتله سی نین غیر اینسانی بیر شرایط ده یاشاماسی، زوراکارلیق و قولدور رضا نین میراث قویدوغو فلاکت و بدبخت لیک، گنج صفرخانی بئله بیر دورومون علیهینه عیصیان قالدیرماغا یؤنلدیر. او اوچ نفر یولداشلاری لا بیر لیکده 1321- نجی ایلده سیلاحلی دسته تشکیل ائدیب، مولکدارلارلا مباریزه یه گیریر. بو سیلاحلی دؤیوش 1324-نجو ایله دک داوام ائدیر و بو ایلده گنج صفر عائله قورور.

آذربایجانین مختلف ماحال لاریندا 20 – نجی ایل لرین اوللرینده باش قالدیران مولکدارلار علیهینه کندلی لرین سیلاحلی حرکاتی، نهایت 1324 – نجی ایلین اورتالاریندا بوتون آذربایجاندا سیلاحلی دؤیوشه چئوریلیر. همین ایلین آذر آییندا، آذربایجان دا ایلک دفعه اولاراق ملی حکومت یارانیر.

 صفر خان ملی  قوشونا قوشولور و سروان درجه سی له آذربایجانی و خالقین الده ائتدیگی نائیلیت لری قوروماغا چالیشیر.  آذربایجان دا قورولان ملی حکومتین عؤمرو اوزون چکمیر.

 1325 – نجی ایلین آذر آییندا مرکز دن گوندریلمیش شاه اردوسو آذربایجانا باسقین ائدیر. یئرلی مولکدارلار، سیماسیز و لومپن شخص لر شاه قوشونون حیمایه سی آلتیندا، مینلر جینایته ال ووراراق و مینلرجه عائله اؤز یورد – یوواسیندان دیدرگین دوشور و سورگون ائدیلیر.

بئله بیر وضعیتده صفر خان بیر سیرا سیلاحلی یولداشلاری لا برابر، کوردوستانا کئچیر و اوردا دویوشن سیلاحلی دسته لر له سرحددن آشیب، عیراق اؤلکه سینه کئتمگه مجبور قالیر.

 آنجاق 1327 – نجی ایلده اوردا یاخالانیب، ایران حکومتینه تحویل وئریلیر و اورمیه حبس خاناسیندا دوستاق ائدیلیر.

1329- نجو ایلده صفرخان تبریزین نیظامی محکمه سینه وئریلیر و او محکمه ده، شاهلیق رژیمی علیهینه سیلاحلی دؤیوش آپاردیغی اوچون، اؤلوم جزاسینا محکوم اولور. عینی حالدا قارداشی حسنعلی یه اون ایل و آتاسی محمد حسین کیشی یه ایکی ایل ایش کسیلیر.

1330- نجو ایلده ایران سوییه سینده باش وئرن میللی حرکات، میللی دولتی قوردوقدان سونرا، صفرخانین دوسیاسی اونو اعتراضی اساسیندا تبریزین نیظامی محکمه سیندن اورمیه یه و اوردان ایسه مرکزین عالی محکمه سینه گؤنده ریلیر.

1332- نجی ایلین مرداد آییندا، آمئریکا و اینگیلیس دولتلری نین توطئه لری نتیجه سینده مصدقین ملی دؤولتی دئوریلیر و اوندان سونرا صفرخانین دوسیاسی یئنی دن نیظامی محکمه یه گؤندریلیر.

نهایت 1333-نجو ایلده صفرخانین اؤلوم حؤکمو، عومورلوک دوستاغا چئوریلیر.

صفرخان دوستاقدا اولارکن  خالقین دوستاق ائولادلاری نین ایشگنجه گاهلاردا آپاردیقلاری مباریزه ده فعالجاسینا ایشتیراک ائدیر و بیر مقاومت سیمبلی کیمی، مباریزه یه گوج وئرن و اعتراض سسینی یوکسلدن قوه یه چئوریلیر. نهایت تبریز زندانیندان، اورمیه حبس خانا سینا گوندریلیر و 1337- نجی ایلده  برازجانین دهشتلی قازاماتینا سورگون ائدیلیر. آنجاق صفرخانین ایراده سی، اونون مقاومتی و ظولم اؤنونده دیره نیشی، برازجان قازاماتین دا سارسیلدیر.

1341- نجی ایلده صفرخان فداکار حیات یولداشی، تهران دا اونون گؤروشونه گلدیگی زامان خسته لنیر و دونیادان گؤز یومور. بو بیرگه یاشامین یگانه محصولو "مهین" آتا اوزونه حسرتیلیک له برابر، آناسیزدا قالیر. بیر ایلدن سونرا صفر خانین آتاسی و آناسی دا دونیادان کؤچور.

1346- نجی ایلده صفرخانین ایلک دفعه اولاراق گؤروشچوسو اولور. او ییریمی ایلدن سونرا قیزی مهین، بالاجا نوه سی بهروز و قیزی نین حیات یولداشی محسن عباسی نین اوزونو گؤرور.

1347- نجی ایلده شاهلیق رژیمی صفرخانین سارسیلمایان ایراده سینه تسلیم اولاراق، اونو برازجاندان تهرانین قصر دوستاغینا منتقل ائدیر. بوردا صفرخان تجربه لی و مقاومت گؤسترن قدیمی بیر محبوس کیمی،  گنج محبوسلارین دایاناجاق، اومید اوجاغی و اونلارین مقاومتینده ایلهام منبعینه چئوریلیر.

1352- نجی ایلده ساواک مامورلاری، دوستاقلارا گئدن مقاومت مباریزه سینی سیندیرماق اوچون تهران و بیر چوخ بویوک شهرلرین دوستاقلارینا هجوم گتیریر. شرایط گرگینله شیر، آنجاق خالقین قهرمان اوغول و قیزلاری نین مباریزه سی بیر آن دا اولسون، دایانمیر.

1354- نجو ایلده صفرخانی، یالنیز آدی دهشت تؤره دن "کمیته مشترک" ایشگنجه گاهینا منتقل ائدیر و اؤز اینامیندان ال گؤتورمه مه یی اوچون ایشگنجه آلتینا آلیرلار. اوندان تؤبه اومورلار. آنجاق کئچمیش 29 ایلده اولدوغو کیمی، یئنه ده صفرخان قالیب چیخیر و اونون "یوخ" جاوابی جلادلاری ناکام قویور.

1355-نجی ایلده یئنی دن صفرخانی "کمیته مشترک" ایشگنجه گاهینا آپاریب و اونو آغیر ایشگنجه لر آلتیندا اؤلمه یه و یا "آریامهر"دن عفو ایسته مک مجبوریتینده قویورلار. آنجاق صفرخانین بیر جوابی اولور. یوخ

نهایت ده صفر قهرمانیان 17/08/81 ده هشتاد بیر یاشیندا دونیادان کؤچور.اونون روحو شاد.

منبع خبر : نازخند صبحی
نظرات كاربران :
نام :
ايميل :
متن نظر : * 
 
متن بالا را وارد نماييد* 
 
آخرين اخبار
پر بازديد ترين مطالب
صفحه اصلي | نقشه سايت | تماس با ماتمام حقوق مادی و معنوی این سایت متعلق به نويد آذربايجان می باشد و استفاده از مطالب با ذکر منبع بلامانع است.
طراحي سايت و بهينه سازي سايت توسط سارگون