جستجو
تاريخ انتشار : 93/10/22 - 13:
آی جا
آی جا

 

- «آپیس[1]- دَن یازاق»،- دئدی.

- «یوووو... آی‌دان»

- «منیم آی-ییم آپیس-ین آننیندا»

- «آمما منیمکی ائویمین دامیندادی»،- دئدیم. تلفون دسته‌یی الیمده، قالخیب پنجره‌نین پرده‌سینی قیراغا چکدیم. اون‌ دؤرد گئجه‌لیک آی اوسکو چؤره‌یی ‌ایدی. پنجره‌نی آچیب، اَلیمی گئجه‌نین ایچینه اوزالتسایدیم‌سا، بیر پارچا قوپاریب، یئیه بیلردیم. آنجاق پنجره‌نی آچمادیم. دؤنوب موبل اوستونده یایلاندیم. قولاغیم آیلارین ویررا- ویر دانیشیغیندا، گؤزوم آج قورد تک گئجه‌نین قارانلیغینداکی اوسکو چؤره‌یینده قالمیشدی.

- «آپیس-ین کوره‌یینده‌کی ناخیشلار جان وئریر جانلی بیر سوژه‌یه. بیر فیکیر وئر،... قارتال‌... قوزغون... هله آلنینداکی آغ لکه‌نی دئمیرم هااا...»

- «ایسته‌سم یازیم، اؤز «اوُروُز[2]»وموزدان یازارام دا... بیر تصوّور ائله...او قوشا بوینوزلاری‌نین یئرینه آی- ین هلالی تاخیلمیش اولسون»

- هه... بوینوزلو بؤح کیمی...

- فیلیم تعریفله‌میرم ها... «اوروز» اوسطوره‌وی بیر کارئکتئردی. باشین چیخمیر، دئنه آدینی ائشیتمه‌میشم داااا... 

آیلارین نارین- نارین گولوش سسی قولاغیمدا قایناییر.

- «قیزیم هامی سنین کیمی تیزهوش اولماز کی، من کوٍت‌بئیینم. هله اولاری بوشلا. باخ گؤر گؤیده نه خبردی!... یاپیشقان کیمی یاپیشبسان موبلا، دور آیاغا گئت پنجره قاباغینا بیر آیا باخ، گؤر نه عالمدی!»

- «منه دئییبلر آیا باخما، آی جوان قیزلاری توولاییب آپارییب، آتیب- توتار»

آیلار پیققیلداییب گولور. آغزی‌نین سویو تلفون دسته‌ییندن قولاغیمین ایچینه آتیلیر، دئیه‌سن. تلفون خط‌ینه توخونور. قولاغیم آزارلانیر یوخسا خط‌لر بیر- بیرینه قاریشیر،  بیلمیرم. آنجاق عنایین سس‌لر ائشیدیرم...

باخیرام. اوتوردوغوم یئردن اون‌دؤرد گئجه‌لیک آیا باخیرام. گؤزلمه‌دی‌ییم سس‌لر قولاغیمی زورلاییر. عاغلیم قاریشیب. آیلارین سسی حئیوانلارین سسینه دؤنوشور. گؤرمه و ائشیتمه حیسّ‌لریم بیر- بیرینه دولاشیر، قاریشیر. بایقوش‌لار بینالارین باشیندا قاناد چالیب، کُر اوخویورلار. قوردلارین اولاماسی نامعلوم بیر مکاندان سونات[3] کیمی سسله‌نیر. پیشیک‌لر پنجره‌نین شوشه‌سین جیرماقلاییرلار،  آیلارین سسی ایتیب...

یایلاندیغیم موبل اوستوندن آی، گونش و یئر کوره‌سی‌نین بیر خطّ‌ده، بیر سیرادا دوزولمه‌سی عاغلیمدا جانلانیر. اون‌دؤرد گئجه‌لیک آی اوسکو چؤره‌ییندن بیر بالیقچی‌یا دؤنوشوب[4]، ال- قول آچیب دایاندیغی یئردن ماقنیت انرژیسینی توْر کیمی یئر اوزونه ساری آتیر. توْرا دوشموش کیمی‌ام. قوللو- قووتلی بالیقچی، توْرونو اؤزونه ساری چکیر...

نابلد، قارانلیق بیر مکانا دوغرویام. گاهدان یئددی بوداقلی بیر آغاجین بوداقلاریندان یوخاری قالخیرام، گاهدانسا یئریمی دَییشیب، یئددی پیلله‌لی زیگوراتا بنز‌ر بیر داغدان یوخاری قالخماقدایام. گؤوده‌می خئیمه‌نین اورتا دیره‌یی‌نین قیراغینداکی دئشیکدن یوخاری چکیرم. بوز کیمی پارلاق اورتا دیرک یئر اوزونه ساری اوزانیب. اولدوزلار دئیه‌سن قیزیل آت سوروسودور، اووسارلاری اورتا دیره‌یه باغلانیب. خئیمه‌نین یوخاری باشیندا شاهلارین دیوانینا بنز‌ر بیر دیوان[5] گؤرونور. لعل- جواهیر یئرینه اولدوزلاردان داش- قاش دوزولوب دیوانین گونش شکلینده یونولموش باشلیغینا. آی قووق کیمی دیوانین باشلیغینا دوغرو هاوالانیب، آرخاسی گونشه، شرقین یئددی اؤلکه‌سیندن گلمیش، یئددی خاتینا باخیر. هانسی اؤلکه‌نین خاتینلاریدیر، منه بللی دئییل. آنجاق خاتینلارین باشلاریندا صنوبر یارپاغیندان توخونموش تاج گؤرونور. الیمی تاجیما چکیرم. کاش کی، زئیتون یارپاغیندان توخونموش تاج قویولاردی باشیما،- دئییرم. آی، دیل- دوداغی ترپنمه‌دن دانیشیر:

- «صاباح گئجه آی توتولاجاق»،- دئییر. «سیز گوناهکار خاتینلار، آی-ین توتولماغینا سبب اولورسوز. ایندی گوناهلاریزی گؤزوزه سوخاجاغام»

دئیه‌سن آی خاتینلاری محکمه‌یه چکیب، جزالاندیرماق قصدی وار. نه زامان خاتینا دؤنوشموشم، هانسی گوناه ایش باش وئریب مندن، اؤزومون ده خبریم یوخدور. آی یئلله‌نیب، دیوانین باشلیغینا دایانینجا، ماقنیت توْرلاری آشاغی چکیلیر. ژاپن خانیملاری کیمی دیزه چؤکوب، باش اَییریک. یئل، خئیمه‌نی دؤوره‌له‌ین یئددی دیره‌یین اوستونه سالینمیش قارا مخمر گئجه‌لی‌یی یئلله‌ندیریر. گولمه‌ییم توتوب. نظریمه گلیر محکمه شوخلوق کیمی بیر اویوندور. باشیم آشاغیدا، بیر آن عاغلیمدان کئچیر: ایندی کی، ایستر- ایسته‌مز آیاغیم آی کوره‌سینه چاتیب، دئیشکدن ائشییه سویروشوب، بیرباشا آی کوره‌سینی گزیب، دولاشیم. سونرا هر ایشدن اوّل، نیل آرمسترانگ-ین آیاق ایزلرینی آی کوره‌سینده آختاریم. هئچ اولمازسا اونون شوبهه‌لی سفری، اؤزومه یقین اولسون. دیزه چؤکموش حالدا باشیمی آستاجا یوخاری قالخیزیرام. منه ائله گلیر کی آی، آیاق آلتین گؤرمور. یئریمدن ترپندی‌ییمده گؤرونمز ماقنیت توْرلاری منی قالدیغیم یئرده چارمیخا چکیب، باشیمی او بیریسی خاتینلار کیمی یئره تیکیر. گؤزلریمیز تلسکوب گؤزلویونه دایانیر. یئر اوزونه باخیریق. تلسکوپون گؤزوندن، یئددی اؤلکه‌ده، یئددی خاتینین ائکیزتایلاری گؤرونور. هر خاتینین اؤنونده بیر بیلگی‌سایار و بیلگی‌سایارلارین مانیتورلاریندایسا، چت پنجره‌لری آچیلیب‌دیر. گئجه‌نین گؤزونده یاریم‌چیلپاق گئجه‌لیک‌لرینی گئیینمیش خاتینلار نئشه‌لی حالدا بارماقلاری کلاویه‌لرین اوستونده رقص ائدیر. اؤزومو گؤرونجه هؤووشنه ایچیمه دولور. دئمک، آی  یوخاریلاردان چت صحیفه‌سینه ده نظارت ائدیر. تلسکوپون گؤزلویوندن دیقّت‌له اؤزومو ایزله‌ییرم. بارماقلاریم هردن بیر دایانیب، نفس آلیر. سونرا کلاویه‌لرین اوستونده نئشه‌لی بیر رقصه دوام ائدیر.

یئریمده چابالیرام. آیین ماقنیت چکیمیندن قورتولوشا چالیشیرام. خیئمه‌نین آلتینداکی دئشییه ساری سورونورم. دریندن نفس آلیرام. اوزاقلارا زیلله‌نیرم. قونشو کهکشاندا، اولدوزلارلا میسمارلانیب، عین حالدا زنجیره چکیلمیش آندرومدانی گؤزوم آختاریر. پنجره‌نی آچیرام. بیر دَنه بوتون اوسکو چؤره‌یینی هؤپورتمک قدر آجیخمیشام. یئل تئللریمی پیرتلاشدیریب، آلنیما تؤکور. آیلارین سسی تلفون تئلیندن قولاغیما توخوخور:

- «هله خبرین وار صاباح گئجه آی توتولاجاخ؟»...

 

 

 

 

 

 

 

 



1- آپیس: آلنی آغ اینک. قدیم میصیرده، بئله اینک‌لری پرستش ائدرمیش‌لر. کمبوجیه‌نین آپیس-ی خنجرله یارالاماسی، آپیسی-ین اؤلومو «هرودوت»ون یازیلاریندا گلیب.

 

2- ده‌ده قورقود داستانیندا قازان‌خانین اوغلو. اونون اسیرلی‌یی کتابین بیر بویونو احتوا ائدیر.

3- سونات: [ایتالیا دیلیندنآلینما. تک چالینان ساز. اؤرنه‌یین: بتهونین «مهتاب» سوناتی اثری.

4- دؤنوشمک: مسخ اولماق.

5- دیوان: سلطنت تختی.

منبع خبر : رقیه کبیری
نظرات كاربران :
نام :
ايميل :
متن نظر : * 
 
متن بالا را وارد نماييد* 
 
آخرين اخبار
پر بازديد ترين مطالب
صفحه اصلي | نقشه سايت | تماس با ماتمام حقوق مادی و معنوی این سایت متعلق به نويد آذربايجان می باشد و استفاده از مطالب با ذکر منبع بلامانع است.
طراحي سايت و بهينه سازي سايت توسط سارگون