جستجو
تاريخ انتشار : 93/6/20 - 19:13
یالانسیز یاشاماق/ آلکساندر سولژنیتسین
یالانسیز یاشاماق/ آلکساندر سولژنیتسین


 

بوتون بونلاردا هئچ ده "اونلار" گوناهکار دئییل، هر شئیده بیز اؤزوموز گوناهکاریق! واخت وار ایدی جینقیریمیزی دا چیخاردا بیلمیردیک. ایندی آرتیق"سامیزدات" یازیب- اوخویوروق، اینستیتوتلارین دهلیزلرینه ییغیشیب اوره‌ییمیزی بوشالدیریق: "گؤر نه اویوندان چیخیرلار، گؤر بیزی هارا سوروکله‌ییرلر؟!". خارابالیق و یوخسوللوق ایچینده یئره- گؤیه سیغمایان لووغالیق، وحشی رژیملرین هاردا گلدی محکم‌لندیریلمه‌سی، وطنداش ساواش‌لارینین قیزیشدیریلماسی... کئفلری ایسته‌سه، بیزی اؤز الیمیزله بسله‌ییب بؤیوتدویوموز مائوتسه‌تونگ-ون اوستونه ده گؤندره بیلرلر و گئدریک- چاره‌میز نه‌دیر؟ کیمی ایسته‌سه‌لر حبس ائله‌ییرلر، ساغ- سلامت آداملاری دلیخانایا سالیرلار.

 ایسته‌دیکلری اویونو چیخاریرلار، بیزسه عاجیزیک، گوجسوزوک. سونوموز چاتیب، معنوی اؤلوم آرتیق بیزی یاخالاییب و فیزیکی اؤلوم ده قاپیمیزین آغزینی کسیبدیر: اؤزوموزو ده، اولاد- اوشاغیمیزی دا کوله دؤندرمه‌یه حاضیردیر، بیزسه، اوّلکی کیمی هورکک- هورکک قیمیشیر، دوداق آلتی میزیلدانیریق: "نئجه مانع اولا بیلریک؟ بیزده او زور هانی؟". آداملیغیمیزی او درجه‌ده ایتیرمیشیک کی، بوتون پرنسیپلری، معنویاتیمیزی، آتا- بابالاریمیزین بوتون ائله‌دیکلرینی، نوه‌لریمیزین ائلیه بیله‌جکلرینین هامیسینی بیر قارین چؤره‌یه قوربان وئریریک- تکی کؤهنه نیظام پوزولماسین، وجودوموزا خطر توخونماسین. بیزده نه قطعیت، نه غرور، نه ده اورک یانغیسی قالیب. بیز بوتون بشریتین آخیرینه چیخا بیله‌جک آتم اؤلوموندن و اوچونجو دونیا ساواشیندان دا قورخموروق (بلکه دلمه- دئشیکده یئر تاپیب گیزلنه بیلدیک!).

 بیز یالنیز جسارتلی وطنداش آددیمی آتماقدان قورخوروق. تکی، سورودن آیریلمایاق، تکباشینا بیر آددیم آتمایاق- بیردن بیر پارچا چؤره‌ییمیزی ایتیرریک، گازدان، ایستی سودان، مسکوا قئیدیاتیندان الیمیز چیخار. سیاسی درنکلرده بئینیمیزه محکم یئریدیبلر کی، عؤمور بویو ثابت و راحات یاشاماق گرکدیر: چئوره‌دن، سوسیال شرایطدن قاچا بیلمزسن، وارلیق شعورو معین ائله‌ییر، یعنی بیزلیک بیر ایش یوخدور، بیز هئچ نه ائلیه بیلمریک. آنجاق هر شئی الیه بیلریک! یالاندان اؤزوموزه توختاقلیق وئریریک. بوتون بونلاردا هئچ ده "اونلار" گوناهکار دئییل، هر شئیده بیز اؤزوموز گوناهکاریق! دئیه بیلرسینیز کی، آخی حقیقتا چیخیش یولو یوخدور! آغزیمیزی تیخاییبلار، نه بیزه قولاق آسان وار، نه بیزدن سؤز سوروشان. اونلاری نئجه مجبور ائلییه‌ک کی، بیزه قولاق آسسینلار؟

اونلاری اؤز فیکریندن دؤندرمک دوغوردان دا مومکون دئییل. یاخشی اولار کی، اونلاری یئنیدن سئچک! آنجاق بیزیم اؤلکه‌ده هئچ واخت هئچ کس یئنیدن سئچیلمیر! غربده آداملار تعطیللر، اعتراض گؤسترمه‌لر کئچیریرلر، آنجاق بیز او قدر باشی قاپازلی اولموشوق کی، بئله شئیلردن قورخوروق: نئجه یعنی ایشدن بویون قاچیراسان، نئجه یعنی کوچه‌لره تؤکوله‌سن؟ مصیبتلرله دولو سون عصر روس تاریخینین دؤنه- دؤنه سیناقدان چیخاردیغی فلاکتلی (اوسته‌لیک، حقیقتا ده بیزه خدمت ائلمه‌ین) یوللارلا گئتمک لازم دئییل! بیر واخت اکیلن او توخومون بوی وئریب آرتدیغی ایندیکی دؤورده ترورلا، قانلی عصیان و وطنداش ساواشی ایله اؤلکه‌نی عدالتلی و خوشبخت ائلمک ایسته‌ین او اؤزوندن راضی جوانلارین نئجه آزدیقلارینی، نه بویدا سهوه یول وئردیکلرینی هامی آیدین گؤرور. یوخ، ساغولون، معارفچی آتالار! ایندی گؤروروک کی، چیرکین متودلار، چیرکین ده نتیجه‌لر دوغورور. قوی اللریمیز قانا بولاشماسین! بلکه دایره قاپانیب؟ دوغوردان‌می چیخیش یولو یوخدور؟ بیزه آنجاق اوتوروب گؤزلمک‌می قالیر؟ بیردن نسه اؤز- اؤزونه باش وئردی؟... لاکین هئچ اولماسا، اونون ان یارالی یئریندن (یالاندان!) قاچمایاجاغیق‌سا، یالان هئچ واخت اؤز- اؤزونه بیزدن ال چکمیه‌جک.

 زوراکیلیق آداملارین دینج حیاتینا سوخولاندا لووغا- لووغا، قیمیزی- قیرمیزی بایراق قالدیریر: "من زوراکیلیغام! داغیلین، چکیلین- ازه‌رم!". آنجاق زوراکیلیق تئز قوجالیر، او، اؤزونه اوزون مدت گوونه بیلمیر، اؤزونو یاشاتماقدان، یاخشی گؤرونمکدن، گؤزه کول اوفورمکدن اؤترو ال‌اوستو یالانی کؤمه‌یه چاغیریر. چونکی زوراکیلیق یالاندان باشقا هئچ نه‌یین آرخاسیندا گیزلنه بیلمیر، یالان‌سا یالنیز زورون حسابینا یاشاییر. زوراکیلیق بیزه قارشی چوخ واخت آچیق هجوما کئچمیر. او بیزدن یالنیز یالانا بویون ایمه‌یی، هر گون اونا شریک چیخماغی ایسته‌ییر- کؤله‌نین بوتون صداقتی ده ائله بوندادیر.

آزادلیغا چیخماغین ایندیه‌جن محل قویمادیغیمیز ان عادی، ان ساده آچاری ائله بوردادیر- شخصا یالانا قوشولماماق! قوی یالان دونیانی بوروسون، قوی یالان هامییا حاکیم کسیلسین، آنجاق کیچیجیک بیر شئیده مجکم دوراق- یالانین حاکیم کسیلمه‌سینده منیم الیم اولماسین! و بو، سست لوغوموزو آزاجیق دا اولسا، آرادان قالدیرا بیلر. بیزدن اؤترو ان آسانی- یالانی یوخا چیخارماغین ان ساده یولو دا ائله بودور! چونکی آداملار یالاندان اییره‌نیب، اوز دؤندرنده او، ساده‌جه اولاراق، آرادان چیخیر. یالان میکروب کیمی آنجاق آداملاردا یاشایا بیلیر. اورتایا چیخان حقیقتی جار چکمه‌یه، دوشوندویوموزو اوجادان دئمه‌یه یئتیشمه‌میشیک- لازم دئییل، قورخولودور. هئچ اولماسا، دوشونمه‌دیگیمیزی دانیشماقدان ال چکه‌ک! ایچیمیزده قات باغلامیش مطیع‌لیگین فونوندا یولوموز بودور- ان راحات یول؛ گاندی سایاغی وطنداش اطاعتسیرلیگینه (دیله گتیرمک بیله خطالی‌دیر) باخاندا ان آسان یول. دوشونوب- داشینماقٰ، یالانا کسینلیکله اورتاق چیخماماق! یالانین سینیرینی (اونو هره بیر جور گؤرور) آنلاییب او التهاب خطیندن گئری چکیلمک گرکدیر! یالانا دون گئییندیرمه‌سک، اوندا اونون نئجه تئز و انگلسیز ییخیلدیغینا حیرتلنه‌جه‌ییک؛ چیلپاق یالانی چیلپاق شکیلده ده گؤره‌جه‌ییک. و سونوندا، اطاعتکارلیغیمیزدان چیخیش یولونو قوی هر کس اؤزو سئچسین: یا بیله- بیله یالانا نؤکرچیلیک ائله‌سین (آه، شبهه‌سیز اؤز کئفینده اؤترو یوخ، عایله‌سینی دولاندیرماقدان، بالالارینی یالانا اویقونلاشدیرماقدان اؤترو!)، یا دا چاداشلارا، گله‌جک قوشاغا لایق آدام اولسون. و همین گوندن او؛

-داها بیر کلمه ده یالان یازیب چاپ ائتدیرمه‌سین، یالانا امضا آتماسین.

-یالان سؤزو نه جماعات آراسیندا، نه شخصی صحبتلرده، نه تبلیغاتچی، معلم، تربیه‌چی، نه ده تئاتر آکتورو کیمی  نه اؤزوندن دئسین، نه کاغیذ اوخوسون.

-ایستر رسساملیغین، ایستر هئیکل تراشلیغین، ایستر فوتونون، ایسترسه ده موسیقی‌نین واسطه‌سیله هئچ بیر اویدورمایا حقیقت دونو گئییندیرمه‌سین.

-اونو ایستمه‌دیگی نمایش و میتینگه گئتمه‌یه مجبور ائتمه‌یه ایمکان وئرمه‌سین. اوره‌یینجه اولمایان ترانسپارانتی، شعاری لینه آلیب باشی اوزه‌رینه قالدیرماسین.

-کؤنلوجه اولمایان تکلیفین لَهینه ال قالدیرماسین، لایق بیلمه‌دیگی یاخود شبهه‌لندیگی آداما (آچیق و گیزلی) سس وئرمه‌سین.

-ساختالیغینا اولجه‌دن امین اولدوغو مذاکره‌لردن بویون قاچیرسین.

-ناطقین دیلیندن یالان، ایدئولوژی جفنگیات، سورتوک تبلیغات، صحبت ائشیدن کیمی ییغینجاغی، محاضره‌نی، تماشانی، سینمانی یاریمچیلیق قویوب چیخسین.

-اینفورماسیانی ساختالاشدیران، اصلی فاکتلاری اؤرت-باسدیر ائله‌ین قزئت- ژورناللارا آبونه یازیلماسین، اونلاری ساتیشدان آلماسین.

البته، بیز یالاندان اوزاقلاشماغین واجب شرط و امکانلاری‌نین هئچ ده هامیسینی سادالامادیق. تمیزلنمه‌یه باشلایان- باخیشلاری آیدینلاشیب دورولان هر کس باشقا ایمکانلاری آسانجا سئچه بیلر. بلی، ایلک واختلار چتین اولاجاق. کیمسه بیر مدت ایشدن قوولاجاق. دوغرو- دوزگون یاشاماق ایسته‌ین جوانلارین حیاتی ایلک واختلار لاپ غلیظ‌لشه‌جک، آخی اونلارین اوخویوب جواب آرادیقلاری درسلیکلر یالانلا دولودور-.

اونلاری دا اله‌ییب سئچمک گرکدیر. آما ناموسلو اولماق ایسته‌ین، هئچ بیر واخت، حتی قورخوسوز- هورکوسوز تکنیکی علم لرده بیله حقیقته و یا یالانا، معنوی مستقل‌لیگه و یا معنوی نؤکرچیلیگه طرف آددیم آتارکن سادالادیغیم شرطلری پوزماسا، اؤزونو آلدادا بیلمز. اؤز روحونو قوروماغا تپری چاتمایان آدام قوی قاباقجیل باخیشلاری ایله اؤیونمه‌سین، آکادمیک و یا خالق آرتیستی، امکدار خادم و یا ژنرال اولماسی ایله لووغالانماسین، قوی اؤز- اؤزونه بئله‌جه ده دئسین: من قویونام و قورخاغام، تکی قارنیم توخ، باشیم سلامت اولسون.

 بوتون مقاومت یوللارینین ان ساده‌سی اولان بو یول بیزیم اوچون آسان کئچمه‌یه‌جک. آنجاق اؤزونو یاندیرماقدان و آجلیق کئچیرمکدن ده آغیر اولمایاجاق: آلوو بدنینی سارمایاجاق، ایستی گؤزلرینی قارسالامایاجاق و عایله‌ن اوچون هئچ اولماسا قارا چؤرک، ایچمه‌لی سو تاپیلاجاق. بیزیم خیانت ائتدیگیمیز، آلداتدیغیمیز بؤیوک آوروپا خالقی- چک‌لر، سلوواک‌لار لیاقتلی اورک گزدیرن آرخاسیز- کؤمکسیز سینه‌نی تانک قاباغینا وئرمک اؤرنه‌یینی گؤسترمه‌دی‌می؟ دئییرسینیز چتین یولدور؟ چتین یولدور. آنجاق مومکون یوللارین ان آسانی دیر. جان اوچون چتین اولسا دا، روح اوچون یگانه یول دور.

چتین یولدور، ‌آنجاق آرتیق بیزده آداملار وار کی (حتی بئله آداملار اونلارجادیر)، نئچه ایللردیر بو شرطلره عمل ائله‌ییر، یولون چتین‌لیگینه قاتلاشیر، حقیقت‌له نفس آلیرلار. و بئله‌لیکله بو یوللا بیز بیرینجی گئتمیریک، گئدنلره قوشولوروق! سیرالاریمیز نه قدر مهربان و سیخ اولسا، یولوموز او قدر آسان و قیسا اولار. بیز مینلرجه اولساق، هئچ بیریمیزه هئچ نه ائلیه بیلمیه‌جکلر. اون‌مینلرجه اولساق، اؤلکه‌نی تانینماز درجه‌ده ده‌ییشه بیلریک! قورخاقلیق ائله‌سک، اوندا کیمینسه بیزه آمان وئرمه‌دیگیندن گیلئی‌لنمه‌یک- اؤزوموزه آمان وئرمه‌ین ائله بیز اؤزوموزوک! بلکه هله دؤزک، گؤزله‌یک کی، واخت گلسین، بیولوگ قارداشلاریمیز بیزیم فیکیرلریمیزی اوخوماق و ژن‌لریمیزی ده‌ییشدیرمک مسئله‌سینی تئزلشدیرسینلر؟... اگر بوندا دا قورخاقلیق ائله‌سک، اوندا بیز رذیلیک، یارارسیزیق و پوشکینین نفرتیه لاییقیک:

آزادلیق سورونون نه‌یینه گرک؟

نسیلدن نسیله اونون قسمتی

نوختادیر، قامچی دیر، بیر ده دیه‌نک.

 

منبع خبر : سوسن نواده رضی
نظرات كاربران :
نام :
ايميل :
متن نظر : * 
 
متن بالا را وارد نماييد* 
 
آخرين اخبار
پر بازديد ترين مطالب
صفحه اصلي | نقشه سايت | تماس با ماتمام حقوق مادی و معنوی این سایت متعلق به نويد آذربايجان می باشد و استفاده از مطالب با ذکر منبع بلامانع است.
طراحي سايت و بهينه سازي سايت توسط سارگون