جستجو
تاريخ انتشار : 93/6/12 - 12:32
گؤزلریمیزی هاردا ایتییرمیشیک؟»
گؤزلریمیزی هاردا ایتییرمیشیک؟»

 

«سرعت‌گیردن سورا، آشقال‌قابینین یانیندا دوشه‌رم»،- دئدی.

سسینی ائشیدنده الینی گؤردوم؛ تاکسی شوفرینه ساری اوزالتمیشدی،پول وئرسین. سسی آیری کیشی‌لرین سسینه بنزه‌ییردی.آمما «آشقال قابی» سؤزو منده او قدر تاثیر بوراخدی کی، تاکسی‌ده ایلشسه‌‌یدیم ده، زیبیل‌قابینین ایچینده نه‌لر وار دئیه، عاغلیما گلدی. مئیوه قابیغیندان توتدو، لیجیخلانمیش گؤی- گؤیرتی، بوشالمیش یاغ بانکالاری، جیریلمیش کاغیذلار،- بلکه‌ده گیزلی یازیلمیش مکتوبلار- کوکا، آیران شوشه‌لری، قانا بولاشمیش کوتکس‌لر، کؤرپه‌لرین نجیس‌لی پمپرز پوشک‌لری، پاستوریزه اولموش دوندورما کاغیذلاری و باشماق قوطولاری، داها نه‌لر، نه‌لر...

چئوره‌ده‌کی گؤزللیکدن، یالنیز زیبیل قابینی گؤرن اینسانین بارماقلارینین بوغوموندا قارا توکلر بیربیرینه قیوریشمیشدی. بارماغین بوغومونداکی توکلر کیشی‌لرین اؤزللیکلریندن ساییلسادا، «آشقال قابی» سؤزونو ائشیتمه‌سه‌یدیم، محال بیر ایش‌ایدی بو آندا او توکلر دیقتیمی چکسین.

گؤزلریمیز‌له چئوره‌میزین نه مناسیبتی اولا بیلر دئیه، دوشوندوم. هانسی کؤشه‌دن، هانسی دوشونجه‌‌ایله اطرافیمیزا باخیریق؟ چئوره‌میزی ندن اولدوغو کیمی دئییل، ایسته‌دیغیمیز کیمی گؤروروک؟ چئوره‌میز، عاغلیمیزدا هانسی تاثیرلری بوراخیر؟ گؤز گؤرونتوسونده اولان گؤزللیک و چیرکینلییین سینیری هاردادیر؟ ندیر؟

ندن جوان بیر اینساندا، خیابانین گؤزلیینی، یام- یاشیل

چیمنلییی، زیبیل قابیدان ایکی آددیم اویانلیق، سالخیملارینی ساللامیش سؤیود آغاجینی گؤره بیلمک قابیلییتی یوخدور، آنجاق باخیش داییره‌سینده خیابانین بیر بوجاغیندا بوراخیلمیش زیبیل‌قابی گؤزونه گلیر؟ بلکه‌ده یاشاییشیمیز زیبیل‌قابینین ایچینده‌کی رنگ به رنگ زیبیللر کیمی بیر بیرینه قاریشیب، اؤزوموزون خبریمیز یوخدور!

ایسته‌دیم دؤنوب، زیبیل‌قابی گؤزونه گلن اینسانین سیر- صیفتینه باخیم. آمما پئشمان اولدوم. بیر آچیدان باخیب، بیر کؤشه‌دن گؤرن اینسانلاری گؤرمک ماراغیمی چکمیر.

منبع خبر : رقیه کبیری
نظرات كاربران :
نام :
ايميل :
متن نظر : * 
 
متن بالا را وارد نماييد* 
 
آخرين اخبار
پر بازديد ترين مطالب
صفحه اصلي | نقشه سايت | تماس با ماتمام حقوق مادی و معنوی این سایت متعلق به نويد آذربايجان می باشد و استفاده از مطالب با ذکر منبع بلامانع است.
طراحي سايت و بهينه سازي سايت توسط سارگون