سنی ده اود اولوب، بیر زامان کؤزوم

آمان دیر یاندیرار، چکیل گئت دالا

نئیله ییم ایستک دن، گؤتومور گؤزوم

پوزولوب دوشه سن، من دوشن حالا

قورخورام غم یوکو، چیگنینی یورا

دلی جه سئومه ییم، اوره یین وورا

بیر الین محبت، وئرن دن سورا

 بیر الین آیریلیق، الیم دن آلا

سن هله بیلینجه، سئوگیلیک یولون

محبت دادین دان کئفلیلیک یولون

قورخورام یتیم لیک، یئسیرلیک قولون

دولاییب بوینوما، غافیل دی سالا

کدرلی دونیاما، گلیب، گلمه میش

بارماغیم تئلینه، دییب، دیمه میش

قورخورام پئشمانلیق، سازین کؤکله میش

اللرین سنسیزلیک غمین دن چالا

قاییت گئت، یازیغین بیر گلسین منه

قوی کؤنلوم شوراهین، سالماسین سنه

قورخورام « آیلار»ی تاپیب سئوه نه...

تکجه بیر خاطره سسین دن قالا